ISS ISS ISS ISS
हिलोमा नि फूल्छौ , बनैमा नि फूल्छौ
बगैंचा पखेरा , घरैमा नि फूल्छौ
तिमी फक्रिनाले मनोभाव जाग्छ
तिमी सामु बस्दा सदा प्रेम लाग्छ
तिमी शुद्ध निष्ठा अनुष्ठानमा छौ
तिमी हर्ष पीडा र श्रृङ्गारमा छौ
गरौ के र चर्चा जहा प्रेम हुन्छ
सह्राना त त्यहा सदा पुष्प बन्छ
छ माधुर्य तिम्रो बिरङ्गी हुनाले
मनै हुन्छ सन्चो तिमीले छुनाले
तिमी पुष्प प्यारो अनेकौं छ नाम
तिमी देखिनाले सबै भुल्छ काम
छ सौर्न्दर्य भर्ने यही कर्म तिम्रो
सदा प्रेम छर्ने बन्यो धर्म तिम्रो
छ सौभाग्य तिम्रो छ चर्चा बखान
तिमी पुष्प तिम्रै छ सम्मान काम
प्रकाश स्याङ्बो
भुजङ्गप्रयात छन्द
ISS ISS ISS ISS
कहाँ हो र त्यसै, म ढुङ्गा बनेको
झझल्को अझै नै, छ पीडा दिएको
तिमी झूट ठान्थ्यौ, गरेको बिलाप
छ विषाक्त तिम्रो, अझै प्रेम दाग
न सन्देह मेरो, थियो प्रेम गर्नु
भयो भूल त्यो नै, म अन्जान बन्नु
म आफै छु साक्षी, थियो प्रेम चोखो
तिमी निष्ठुरीले, बनायौ नि झूटो
तिमी झूट आफू, लुकाएर आयौ
सदा दोष मेरै, बनाएर भाग्यौ
दुखाएर छाती, हिडेको छु धेरै
मिल्यो चोट धेरै, झर्यो अश्रु मेरै
नबोल्दा सहेरै, छु मैले जितेको
यसैमा खुसीले, तिमी छौ रमेको
सहेको छु आफै, लुकाएर पीडा
धराको म धूलो, तिमी बन्नु हीरा
प्रकाश स्याङ्बो
